Երիտասարդ առաջնորդների հակակոռուպցիոն դպրոցում հերթական դասի ընթացքում մասնակիցները քննարկեցին պաշտոնատար անձանց կողմից ներկայացվող գույքի, եկամուտների և շահերի բախման հայտարարագրերի հասկացությունը, տեսակները, ստուգման փուլերը, ՀՀ օրենսդրական կարգավորումները և բացերը՝ միջազգային լավագույն փորձի ներքո:
Դասը վարում էր Հայաստանի ՔՀԿ-ների հակակոռուպցիոն կոալիցիայի փորձագետ Մարիամ Զադոյանը։
Հայտարարագրերն ունեն երկու հիմնական նպատակ՝ բացահայտել ապօրինի հարստացման և շահերի բախման դեպքերը։ Հայտարարագրերը գործող օրենսդրության համաձայն ներկայացվում են Բարձրաստիճան պաշտոնատար անձանց էթիկայի հանձնաժողով, որոնք հրապարակվում են վերջինիս պաշտոնական կայքում՝ www.ethics.am-ում։ Կոռուպցիայի կանխարգելման հանձնաժողովի կազմավորմամբ վերջինս կդառնա հայտարարագրերի ռեեստր վարող մարմինը։
Մարիամ Զադոյանը ներկայացրեց, որ թեև Հայաստանում հայտարարագիր ներկայացնում են միայն պաշտոնը ստանձնելիս, դադարեցնելիս և տարեկան, սակայն միջազգային պրակտիկայում կան նաև այլ հայտարարագրերի տեսակներ, օրինակ՝ ըստ պահանջի հայտարարագրեր, հայտարարագիր՝ դրանում էական փոփոխություն կատարելու մասին և այլն։
Միջազգային պրակտիկայում ընդունված է, որ հայտարարագրերի ռեեստր վարող մարմինը հայտարարագրերի ստուգումն արդյունավետ իրականացնելու նպատակով կատարի հետևյալ 4 փուլերն էլ։
1.Հայտարարագրերի ներկայացման պահանջների պահպանման ստուգում,
2.Հայտարարագրերի լրացման ձևի պահանջների պահպանման ստուգում,
3.Հավաստիության ստուգում,
4․Ֆինանսական ստուգում։
Բացի այդ, փորձագետի խոսքով՝ օրենքի բացերի թվին է պատկանում այն, որ ով ոչ ակտիվ հանդիսացող ծախսերը չեն հայտարարագրվում, այսինքն թանկարժեք ավիատոմսերը, հյուրանոցների վարձավճարները և այլն, ուստի հնարավոր չի լինում վերլուծել դրամական միջոցների ներհոսքն ու արտահոսքը և կատարել եզրակացություններ։
Կարևոր է, որ շարունակաբար բոլոր պաշտոնատար անձանց կարողանանք բերել օրենքի դաշտ, քանի որ հիմա էլ քան մի շարք մեծահարուստ պաշտոնյաներ, որոնք դեռևս չունեն հայտարարագրման պարտականություն։
Մեկ այլ խնդիր է այն,որ հրապարակման ենթակա տեղեկատվությունը խիստ սահմանափակ է։
Տեսական մասը զուգորդված է պրակտիկ առաջադրանքի կատարումով, որը միտված էր ունկնդիրներին սովորեցնել վերլուծել հայտարարագրեր։
Երիտասարդ առաջնորդների հակակոռուպցիոն դպրոցը կազմակերպում է «Իրավաբանների հայկական ասոցիացիա» հասարակական կազմակերպությունը՝ Հայաստանի ՔՀԿ-ների հակակոռուպցիոն կոալիցիայի հետ համագործակցությամբ:
Երիտասարդ առաջնորդների հակակոռուպցիոն դպրոցի տեղեկատվական գործընկերն է Իրավաբան.net անկախ մասնագիտական լրատվական կայքը:
