Հակակոռուպցիոն դպրոցում քննարկեցին տնտեսական ընկերություններում հակակոռուպցիոն համապատասխանության ծրագրերի ներդրման հարցերը
Երիտասարդ առաջնորդների հակակոռուպցիոն դպրոցի ունկնդիրները Իրավաբանների հայկական ասոցիացիայի փորձագետ Լուսինե Նալբանդյանի հետ քննարկեցին հակակոռուպցիոն համապատասխանության ծրագիրը (ՀՀԾ)։
Փորձագետը նախ ներկայացրեց իրավաբանական անձանց պատասխանատվության վերաբերյալ տարածված մոդելները՝ ներկայացնելով անգլոսաքասոնական և մայրցամաքային իրավունքի երկրների փորձը։ Այնուհետև, նա խոսեց Հայաստանի ստանձնած միջազգային պարտավորությունների մասին, որոնց շրջանակում Հայաստանը պարտավոր է նախատեսել իրավաբանական անձի քրեական պատասխանատվության ինստիտուտը։ Շեշտադրում կատարեց ՀՀԾ-ի ներդրման անհրաժեշտության վրա Հայաստանում՝ ներկայացնելով փաստեր ՀՀ-ում բիզնես ոլորտում առկա կոռուպցիոն ռիսկերի մասին, մասնավորապես՝ Հայաստան ներդրումներ կատարող երկրների կոռուպցիայի դրսևորումներով հանդես գալու բարձր ռիսկայնությունը։ Ինչպես նաև, նա անդրադարձավ տնտեսական գործունեություն իրականացնող սուբյեկտների անհատական և գլոբալ օգուտներին, եթե վերջիններս ներդնեն ՀՀԾ-ն իր բոլոր բաղադրիչներով։ Նրա խոսքով՝ մասնավոր ոլորտին անհրաժեշտ է ՀՀԾ-ի ներդնումը։ Այն կօգնի ընկերությանը խուսափել քրեական պատասխանատվությունից, կկրճատի գործարարության ծախսերը, կներգրավվի նոր ներդրումներ, կբարձրացնի տվյալ ընլկերության գործարար համբավը, կառողջացնի ՀՀ-ի բիզնես միջավայրը և կկանխի կոռուպցիոն ռիսկերի ի հայտ գալը, ինչը աստիճանաբար կնպաստի կոռուպցիայի նվազեցմանը բիզնես ոլորտում։
ՀՀԾ-ի կարևոր է սկզբունք է ընկերության ղեկավարի ներգրավվումը տվյալ գործընթացքում, հաշվետվողականությունը, գործընթացի թափանցիկությունը, արդյունավետությունը, վերահսկողությունը և աշխատակիցների ներգրավվումը։ Փորձագետն իր խոսքում նշեց, որ կարևոր է ՀՀԾ-ն, ներառյալ՝ կորպորատիվ կառավարման, էթիկայի, գործարար շրջանառության կանոնները ներդնելիս հանձնառությունը դրսևորվի ղեկավարության կողմից։ Ղեկավարությունը պետք է ձգտի ներգրավել աշխատակիցներին այդ գործընթացի մեջ՝ օրինակ ծառայելով նրանց համար։
«Կարևոր է նաև ռիսկերի գնահատումը։ Պետք է որոնել թույլ կողմերը, որոշել կոռուպցիայի ծագման հավանականության աստիճանը, հատուկ ուղադրություն դարձնել կոռուպցիայի ծագման հնարավորությունների վրա։ Պետք է ներդնել ռիսկերի կառավարման պլան, կատարել պլանի գնահատում և պարբերաբար վերանայել պլանը։ ՀՀԾ-ն քարացած համակարգ չէ․ այն ենթադրում է մշտապես բարելավում և մոնիթորինգ։ Չենք կարող ՀՀԾ-ն ներդնել միայն մասնավոր սեկտորում և հաջողել կոռուպցիայի դեմ պայքարում․ այն պետք է գործի նաև հանրային ծառայողների շրջանակում»,-նշեց Լուսինե Նալբանդյանը։
Երիտասարդ առաջնորդների հակակոռուպցիոն դպրոցը կազմակերպում է «Իրավաբանների հայկական ասոցիացիա» հասարակական կազմակերպությունը՝ Հայաստանի ՔՀԿ-ների հակակոռուպցիոն կոալիցիայի հետ համագործակցությամբ:
Երիտասարդ առաջնորդների հակակոռուպցիոն դպրոցի տեղեկատվական գործընկերն է Իրավաբան.net անկախ մասնագիտական լրատվական կայքը:
